ҮБҺЭНЭЙ

тэмд. н. үбһэ абахада хабаатай, үбһэндэ хэрэгтэй (сенокосный, сеноуборочный): Орлогшо дарга энэ үбһэнэй машина заһабарилһан хойноо бусаха гэһэниинь болобогүй (Ц.-Ж. Жимбиев); үбһэнэй бригада үбһэ хуряалгада оролсоһон бүлэг ажалшад (сенокосная бригада): Үбһэнэй бригада мантан томо хадын ара бооридо байрлаһан байба (Ж. Тумунов); үбһэнэй үе (гү, али хаһа) ногоо унагааха, сабшагдажа хатаһан ногоо хуряажа абаха саг (сенокосная пора): – Юрын хасагуудые табяашьегүй гэлэй, теэд пятидесятник Банзар бэеэ мэдэжэ, үбһэнэй үедэ гэртээ бусаха байгаа юм бэшэ гү? (Ч. Цыдендамбаев); Үбһэнэй хаһа дүтэлжэ, Маншууд баян һүриингөө хонхо зайдан хашаа, хорёонуудые заһуулжа, нютагай үгытэйшүүлые хэды үдэрэй туршада тухашаруулба (М. Осодоев); үбһэнэй хүдэлмэри сабшагдажа хатаһан ногоо хуряажа абаха ажал (сеноуборочные работы): Энээнэй хойно арба гарамгай хоноод байхада, Хэжэнгын зон үбһэнэй хүдэлмэридэ орожо байба (Х. Намсараев).