ТОХИГОР

тэмд. н. 1) годигор, нугагар, гажанги, сэхэрдэггүй, тахигар, тохир (изогнутый, кривой, скрюченный): Баданай острогой зоомол модон хашаа соо ерэхэдэ, үнсэггүй хутагада адли, тохигор һорболжотой хажуурнуудые хэдэн буряад һонирхон үзэжэ байбад (Б. Санжин, Б. Дандарон); тохигор гар сэхэрдэггүй, гажанги гар (скрюченная рука): Тохигор гараа сээжэдээ няаhан Хорлын наhанай хүн гэнтэ гол гудамжын хажуу тээхи харанхы сооhоо тэдэнэй урда гаража ерэбэ (Г.-Д. Дамбаев); тохигор һара хитагар һара (изогнутый полумесяц): Тэнгэриин баруун хаяада тохигор һара үлэ мэдэгхэн харагдажа, эхэнэрэй шэхэндэ һанжаһан нариихан һиихые һануулна (В. Гармаев); 2) нарин, туранхай аад, бүхэтэр, нэрүү, һүүзэгэр (худой и сгорбленный): Тохигор эреэгшэмнай гансата арбан тугал гаргажа шадахагүйл (М. Осодоев); тохигор жаахан бэетэй туранхай, хоршогор, бүгтэгэр, жаахан бэетэй (маленький, худой и сгорбленный): Юумэ бэшэжэ һууһан тохигор жаахан бэетэй зайһан анханһаа сошомхой һэн тула, мүнөөшье һандай дээрэһээ хабтайшан, лагбаантай бэхэеэ шэдэжэрхин алдаба (С. Цырендоржиев); 3) гэмтэжэ, гажанги гү, али хүдэлдэггүй болоһон (изувеченный, искалеченный).