ТОБШО II

1. тэмд. н. богони, тодо (краткий): Тэрэ тула энэ хэрэг тухай эсэслэн тобшо һанал гаргахань тон бэрхэ байха (Ц. Дон); тобшо хуряангы (гү, али тэдыхэн) богони болгоһон (краткий, сжатый): Прокуророй хэһэн энэ мэдээсэлгын һүүлдэ хэрэгшье сүм эли боложо, аймагай комитедэй секретарь өөрөө энэ хэрэгэй дүн гаргажа, тобшо хуряангы аад, тон тодоор хэдэн үгэ хэлэбэ (Ц. Дон); Ажабайдал, ажал хүдэлмэри тухайда тобшо тэдыхэн хөөрэлдөөн болобо (Б. Мунгонов); тобшо тодорхойгоор (гү, али тэдыгээр) богонёор, гол түлэбынь (кратко, в основном): Мүнөө эелдэг нүхэрнай бидэндэ, эгээл эндэһээ эхилэн, өөһэдынгөө ажал үйлэдбэриие танилсуулан, тобшо тодорхойгоор тайлбарилан үргэлжэлнэ (Х. Намсараев); Хэдэн үдэрэй туршада эдэ хоёр сугтаа ябабашье, бэе бэедээ үшөөл даданагүй гү, хөөрэлдөөниинь тобшо тэдыгээр дүүрэшэхэ юм (Д.-Д. Дугаров).