ТЭСЭМГЭЙ

1. тэмд. н. үгэ дуугүйгөөр юумэ дабажа гараха шадабаритай (терпеливый): Буу баридаг хүн холо бодолтой, юумэнһээ тунхаридаггүй, найдамтай, зүрхэтэй, ехэ тэсэмгэй, нигүүлэсхы сагаан һанаатай (С. Доржиев); тэсэмгэй байха бэеэ бариха, бэеэ шанга бариха (быть терпеливым, крепиться): – Тэсэмгэйл бай, миниингээ һанаа бү зобоо (С. Цырендоржиев); ганда тэсэмгэй бэлээр хатадаггүй (засухоустойчивый); хүйтэндэ тэсэмгэй хүйтэндэ даарадаггүй, хүйтэниие дабажа гарадаг (холодостойкий); галда тэсэмгэй галда дүрэдэггүй (огнеупорный): галда тэсэмгэй хирпиисэ; 2. наречи үгэ дуугүйгөөр юумэ дабажа гараха шадабаритайгаар, бэеэ барижа, бодолтойгоор (терпеливо, толерантно): Тэрэнь ниитын харилсаанда онсо шэнжэ оруулаа, хаяа хадхажа ажаһууһан элдэб арадуудай үндэһэ яһанай асуудалда, түүхэдэ, шажан мүргэлдэ, соёлдо ехэ тэсэмгэй хандадаг (hural — buryatia. ru); тэсэмгэй хүлеэхэ удаан, үгэ дуугүйгөөр, хайшаашье ябангүйгөөр, сухалдангүйгөөр хүлеэхэ (терпеливо ждать): Намсараевай сүлөө орохые тэсэмгэй хүлеэн һуугаад, одоол хөөрэлдэхэ һанаатай дүтэлхэдэнь, тэрэнь түргэхэн бодожо, яарамдаг газаашаа гарашаба (Д. Эрдынеев).