ТҮРҮҮЛХЭ I

үйлэ ү. бултанһаа урид ямар нэгэн үйлэ үйлэдэхэ, манлайлха, эхилхэ (опережать, быть первым, приходить первым, быть во главе): Өөһэдөө түрүүлжэ дайсаниие сохёо һаа, һайн амжалтануудые туйлахань дамжаггүй (Б. Шойдоков); түрүүлээд ябаха бултанһаа урид, манлайлан ябаха (идти в голове чего-л.): Түрүүлээд ябаһан гурбан шарга тогтожо, хамаг зон гудамжада хахан обооршобо (Д. Батожабай); адуу түрүүлжэ ябаха адуу дахуулаад ябаха (идти в голове табуна); түрүүлэн ябаhан машина эгээн эхиндэ ябаһан машина (головная автомашина): Колоннын дунда ябаhан жолоошод харгыhаа юундэ гараhанаа ойлгожо ядажа, кабинынгаа үүдэнэй сонхоор толгойгоо шохойлгон бултайлгаад, түрүүлэн ябаhан машинаяа гайхан харанад (Г.-Д. Дамбаев); урилдаанда түрүүлхэ мүрысөөндэ ахиха, урид гараха (опережать в соревновании): Энээхэн хара азарга унажа, урилдаанда түрүүлээд, эзэн баян Шоно Мадаевтаа шан абажа үгэһэн байгаа хаш (Б. Мунгонов); түрүүлэн добтолхо нүгөө талын дайрахые хүлеэнгүйгөөр өөрөө эхилхэ (нападать первым): Урдань хэрхирэлдэгшэ нохойнуудһаа һураггүй аюултай хүсэн арадамни һүнэһыем гартаа баринхай гэжэ ойлгоһон Янгар түрүүлэн добтолбо (С. Цырендоржиев).