СУГЛАА(Н)

(н) юум. н. олон хүнүүдэй хабаадалгатай зүблөөн, хуралдаан, хэлсээн (собрание): Тиихэдэмнай энэ жэлэймнай тоосоото һунгалтын суглаан маанарта мартагдашагүй һайхан, ёһотойл түүхэтэ суглаан боложо үгэхэ байна бшуу (Б. Мунгонов); суглаа хурал олон хүнүүдэй хабаадалгатай зүблөөн (собрание): Мүн элдэб яһатанай хамта хүдэлдэг газарта, суглаа хуралдаануудта, хэрэг хүтэлбэридэшье ород хэлэ хэрэглэһээр байхабди (Л. Шагдаров); суглаа хурал зарлаха хуралдаан тухай дуулгаха, мэдээсэхэ (объявлять о собрании): Хэрбээ танай минии үгэ шагнаха хүсэлгүй байгаа һаа, комсомолой гү, али профсоюзайшье һаа суглаа зарлахыень гуйха баатай болоноб (К. Цыденов); суглаа татаха хүн зониие хуралда оролсохые уриха (созывать собрание): Тиимэһээ һаядаа арбан нэгэн эсэгынгээ түлөөлэгшэдэй суглаа татажа, энэ асуудалаа хэлсэхэ болонобди (Б. Санжин, Б. Дандарон); суглаа хүтэлхэ хуралдаанай ажал ябуулха (вести собрание); суглаа хэхэ (гү, али үнгэргэхэ) хуралдаха, хамтаржа ямар нэгэ шухала асуудал зүбшэн хэлсэхэ, зүбшөөрэлдэхэ (проводить собрание): Курсынгаа дүүрэһэнэй түгэсхэлэй суглаа хэжэ, үнэмшэлгэ саарһаяа абажа, тарахынгаа урда үдэшэ сугтаа байһан хоёр эхэнэр нүхэдтэйгөө кинодо ороһон байгаа (Ц. Дон); Үдэшэлэн колхозой түрүүлэгшэ Дэлэг Батоевич таряашадые Улаан буланда суглуулжа, суглаа үнгэргөөд, Хорлын байдаг гэртэ оробо (Г.-Д. Дамбаев); хамтын суглаан ниитын, бултанай оролсохо хуралдаан (общее собрание): Хамтын суглаан, энэ тэрэ болохо гэжэ зарлал соносхолой үгы байһан хадань, Радна зоной суглархада, гайхан байжа хүдэлнэ (Ц. Дон).