СОЁЛОЙ

тэмд. н. соёлдо хабаатай (культурный): Буряад национальна хубсаһаяа үмдэһэн сэбэр һайхан хүбүүд, басагаднай театрнуудай сценэнүүд дээрэ, соёлой паркнууд соо согтой дорюунаар хатараг лэ (Н. Дамдинов); соёлой ажалтан соёлой талаар ажал ябуулдаг мэргэжэлтэн (культурный работник, культработник); соёлой ордон урлал, уран һайханай туһаламжа олониитэдэ хүргэдэг эмхи зургаан, согсолбори (дворец культуры): Альга ташалган дээрэ дээрэһээ, хойно хойноһоо хүүен нэержэ, үндэр сагаан Соёлой ордонгые дахин дахин дорьбоон доһолгобо (Б. Мунгонов); соёлой хубисхал 1920–1930-аад ондо болоһон совет ниигэмэй оюун сэдьхэлэй хүгжэлтын эрид эрьелтэ (культурная революция): Тиихэ үедэ соёлой хубисхал ябуулжа, улад зониие болбосон байдалда оруулха гээшэ тиимэшье бэлэн хэрэг бэшэ байгаа (Б. Мунгонов); уг дамжаһан соёлой баялиг угай баялиг, урда үенүүдһээ ерэһэн юумэн (культурное наследие); Соёлой уг баялиг гүрэнэй талаһаа хамгаалгын хороон Буряад Уласай мэдэлдэ ородог соёлой баялиг зүйлнүүдые хадагалха, хэрэглэхэ, олондо дэлгэрүүлхэ зорилготой Буряад Уласай Толгойлогшын Захиргаанай болон Буряад Уласай Засагай газарай һалбари (Комитет государственной охраны объектов культурного наследия); соёлой харилсаа холбоо оюун болон эдэй соёлоор харилсаан (культурные отношения): Эдэ бүгэдэ манай үйлэ хэрэгүүдэй гол үзэл бодолые, монгол туургата арадуудай түүхэ болон соёлой харилсаа холбоонуудай шэнжэ шанар, адлидхагдаһан маяг, зоной ниилэл ба бусад зүйлнүүдые баталдаг, дэмжэдэг байха юм (Б.-М. Жигжитов).