САЙН II

аянг. ү. 1) хэн нэгэндэ хандажа амаршалхада хэрэглэдэг үгэ амар мэндэ! (здравствуйте! привет!): – Сайн! – гэжэ Дулма Жамбаловна харюусаад, хармаан сооһоо нөөхи бэшэгээ гаргажа үгэбэ (Б. Мунгонов); амар (гү, али мэндэ) сайн! мэндэ амар! (здравствуй!, здравствуйте! привет!): – Дулма хээтэй, мэндэ сайн! – гэһэн абяан дуулдажа, нэгэ боолтотой юумэ, түйсэтэй һү бариһан Норжомо энеэбхилэн орожо ерэбэ (Ц. Шагжин); – Баярмаа, амар сайн! – гэжэ баггүй ехээр баярлашаhан Хорло мэндэшэлээд, гарыень адхан бариба (Г.-Д. Дамбаев); сайнууд!, сайн байна! амар мэндэ! (здравствуйте!): – Сайнууд, – гэжэ түрүүлэгшэ шүдэнэйнгөө забһараар хэлээд, машина дээрэ гараба (Д. Эрдынеев); – Сайн байна, баабай, – гээд, тэрэ жэрэгэр сагаан шүдэнүүдээ харуулан, энеэбхилһээр гараа һарбайба (С. Цырендоржиев).