УНАХА II

үйлэ ү. мори гү, али бэшэшье унаада (элжэгэн, тэмээн, велосипед, мотоцикл г.м.) һууха, мордоод ябаха (садиться или ехать верхом): Хойто үглөөниинь Нима зэргэшээгэйнгээ мори эмээллэжэ унаад, Янжамын унажа ерэһэн мори хүтэлөөд, Һөөгтэй гүйлгэжэ оробо (Ж. Тумунов); Түмэрэй һайниие дабтажа мэдэхэ, мориной һайниие унажа мэдэхэ (Оньһ. ү.); мори унажа һураха морёор ябажа һураха (учиться езде верхом на лошади): Долоотойдоо мори унажа һураад, арбатайдаа ёһотой урилдаашан болоһон юм (Б. Мунгонов); зайдаар унаха нюргандань эмээл тохонгүйгөөр һуугаад ябаха (скакать без седла): Энэ бэеэрээ морёо зайдаар унаад, ямаршьегүй хатаргажа ошохо шадалгүй байһанаа мэдэрээ бэлэй (М. Осодоев); мотоцикл унаха мотоциклоор ябаха, гүйлгэхэ (ехать на мотоцикле): Харин Сандан мотоциклаа унаад, һур харбаха, барилдаха, бусадшье мүрысөөнүүдтэ хабаадалсаха, дуулаха, хатарха зоноо зарлажа, Үлзытэ соогуураа гүйлгэнэ (Ц. Цырендоржиев).