ТҮҮДЭГ I

юум. н. хээрэ газаа түлеэ гү, али мүшэрнүүдые обоолжо түлиһэн гал (костёр): Үхинхэн Холхой хоёрой зуһалан шадар айхабтар ехэ сэсэг шэнги түүдэг улаабхина (Ч. Цыдендамбаев); түүдэг носоохо (гү, али табиха) хээрэ газаа түлеэ гү, али мүшэрнүүдые обоолжо гал түлихэ (разводить костёр): Түүдэг носоохо талаар залууршан Кузьма Егорыч ехэл шадабаритай бэрхэ хүн байба (Б. Мунгонов); Һалхигүй, наруули хушата ташалангай хаяада хуушан отог олоһон Дамба түүдэг табижа, сай шанажа уугаад, оройхон болотор унтангүй һуугаа (Д.-Д. Дугаров); түүдэгэй наадан үдэшын боро хараанаар залуушуулай суглараад, түүдэг тойрожо наадалга. Хүйтэнэй сагта түүдэг тойроод, харин зунай сагта тэргэ тойродог һэн (игры молодёжи у костра): Энээнэй һүүлээр ахамад ноёд, үбгэд хүгшэд тараад, залуушуул үдэшын түүдэгэй нааданда хатар зугаа хэхэеэ үлөө һэн (Б. Санжин, Б. Дандарон).