ТҮҮДЭБШЭ

юум. н. хээрэ газаа түлеэ гү, али мүшэрнүүдые обоолжо түлиһэн гал, ага галбуун (костёр): Түүдэбшэ унтаранхай, үндэһөөрнь һугалжа асарһан мантан түгсүүл доро уб улаан согууд мүльһэтэшэһэн мэтэ ялайлдан, халуу үгэнэгүй (С. Цырендоржиев); түүдэбшын һуури хээрэ түлеэ гү, али мүшэрнүүдые обоолжо түлигдэһэн галай газар, унтарһан талмай (кострище): Холошье ошонгүй түүдэбшын һуури оложорхибод (С. Цырендоржиев); түүдэбшэ табиха хээрэ газаа түлеэ гү, али мүшэрнүүдые обоолжо гал түлихэ (разводить костёр): Түүдэбшэ табижа харгыдаа хоноод, үглөөнэй наранай нилээд дээрэ дэгдэһэн хойно тэрэ адуушадта хүрөө һэн (С. Цырендоржиев); түүдэбшын наадан басаганай хадамдаа хүргэгдэхын урда басаганай түүдэбшын наадан болохо. Мүн сагаалганай түүдэбшын наадан эмхидхэгдэхэ. Айлшан ерэһэн басаганда зорюулжа энэ наадан болохо. Урдандаа түүдэбшын наадан хонин шарууһатай үнгэрдэг байһан юм. Ямаршье сагта түүдэбшын наада эмхидхэхэдээ, газаа ехэ түүдэбшэ носоожо, тээ саанахана тэргэ абаашажа байлгаад, нааданда хабаадагшад зэргэлжэ хүтэрэлдөөд, хойно хойноһоо субан, бэһэлигэй дуу дуулалдан, гал тэргэ хоёроо нара зүб тойрохо Ц. Номтоев (игры молодёжи у костра).