ТҮРГЭНӨӨР

наречи хурдаар, бушуу, шамдуугаар, шуумгайгаар, шуумайса (быстро, скоро): Зээрдын түргэнөөр гүйхэ бүринь, талын һалхинда, далита бүргэдтэ хүсэгдэшэгүй түргэнөөр гүйлгэхэ дуран сэдьхэлдэ түрэнэ (Ч. Цыдендамбаев); хурдан (гү, али бушуу) түргэнөөр бушуухан, шамдуугаар, яаралтайгаар (быстро, торопливо): Теэд ямар хурдан түргэнөөр, ямар эршэтэй хүсэтэйгөөр, шааян хүүен урданаб! (Б. Мунгонов); Нуурта Минжурай арбан алха дүтэлөөд ябахада, үһэеэ магнай уруугаа эмхигүйгөөр унагаажархиһан хүнэй бушуу түргэнөөр уһа руу онгосо түлхин байхань харагдаба (Ж. Тумунов); мэгдүү түргэнөөр яаралтайгаар, шамдуугаар, һабандуугаар (торопливо, суетливо): Дагба мэгдүү түргэнөөр Сабидараа тэргэдэ оруулжа эхилбэ (Ц. Шагжин); сахилгаан түргэнөөр нюдэ сабшаха зуура, агшан зуура, зура сохин (молниеносно): Шоён хоёр-гурба алхаад, шэмээгүйхэнээр баруун хойтохи тээнгиһээ мүнгэн хэтэ хутагаа шүүрэн абаад, сахилгаан түргэнөөр газаашаа гарашаба (А. Ангархаев); түргэнөөр алхалха хурдаар гэшхэлхэ (быстро шагать): Самбуу ахай тээшэ сэхэ ябажа ябаһан Балжид гэнтэ халба һүрэжэ, хойшоо һүлжэн, түргэнөөр алхалба (Ц. Шагжин); түргэнөөр бүтээхэ арга хурдаар бүтээхэ арга (скоростной метод); али болохо түргэнөөр хурдашагаар, шадахыса хурдаар (как можно скорее, возможно быстрее).