ТОМООР

наречи 1) мантагараар, ехээр (крупно): Шоройень зузааханаар, холоһоо тойруулжа обоолходо хартаабха томоор ургадаг юм (Д. Эрдынеев); томоор бэшэхэ хэмһээ үлүү хэмжээнэй үзэгүүдээр бэшэхэ (писать крупными буквами): Хобхолжо хаяһан газетынь саанаһаа үшөө томоор бэшэһэн гаршагтай саарһан үзэгдэшоо һэн (Д. Батожабай); томо томоор а) ехэ ехээр, мантан мантанаар (помногу, большими кусками): Тарган хониной мяха томо томоор отолон, аман соогоо хоёр-гурба хүлхөөд, гүлд байса залгина (Б. Санжин, Б. Дандарон); б) шэлж. бардамаар, һайрхуугаар (кичливо, самоуверенно): Дан лэ Галшын басага асаржа, гэшхэжэ үнгэжэ байжа, зараса барлаг болгохо хэбэртэй томо томоор хөөрэлдэгшэ һэн (Х. Намсараев); в) шангаар, бүдүүнээр (громко, басом): Дуутай шуутай Банзаракцаев томо томоор хоолойгоо заһасагаан орожо ерэбэ (С. Цырендоржиев); томо томоор гэшхэлхэ холо холо алхажа ябаха, ехэ алхамуудые хэхэ (размашисто шагать): Эрэнсэй хэнииешьеб бэлиндэн хараагаад, Малаата жалгые голлон харьялдаг тайгын горхон тээшэ томо томоор гэшхэлбэ (М. Осодоев); 2) бүдүүзгэй шангаар (с низким, неприятным звуком): Гал залиржа, гэр дотор харанхы болоно, гэрэй эзэнэй томоор хурхирха дуулдана (Х. Намсараев).