ЗОХИДООР
наречи 1) мүртэйгѳѳр, һайса (как следует, подобающе, хорошенько): Соолгоёо утаашань заһаад, эрмэгыень һѳѳл зохидоор хоноожорхиходонь, тэбшэ шэнгихэн болошобо (М. Осодоев); эмхитэй зохидоор мүртэйгѳѳр, ёһоор, һайнаар (как следует): Тэрэ сонхын саагуур эмхитэй зохидоор табяатай байһан элдэб олон нааданхайнууд ямар һонин һайхан бэ? (Ц. Шагжин); 2) таатайгаар, аятайгаар, наартайгаар (приятно): – Ямар зохидоор эльбэнэбта, альганайтнай зѳѳлэн гээшэнь, арайл унташан алдабаб, – гэжэ Насаг хэлээд, Сониин сэлмэг hайхан нюдэ гэтэшэбэ (Г.-Д. Дамбаев); илдам (гү, али урин) зохидоор энхэргэнээр, уринаар, илдамаар (ласково, приветливо): Ямар илдам зохидоор намда хандаба гээшэб гэжэ зосоогоо бодоо һэм (Ц. Шагжин); Хүбүүн басаган хоёр инаг дуран тухай үльгэрые урин зохидоор гүйсэдхэнэ (Д.-Д. Дугаров); 3) таарамжатайгаар, зүйтэйгээр (удобно): Тиигэжэ шиидээд, ангуушан хужартаа анхаралаа табихаяа болижо, зохидоор түбхинэн хэбтээд, нюдѳѳ аниба (Б. Мунгонов); зохидоор һууха тааруугаар һууха (усесться поудобнее): Хүшэшэһэн нюргаяа Дэлгэр сэхэлдюулжэ, модоной һалаа дээрэ зохидоор һуухые оролдобо (В. Гармаев).