ЗАРГА

юум. н. арсалдаата асуудал шиидхэхын тула сүүдтэ үгтэһэн гомдол (жалоба в суд, иск, тяжба): Зарга гээшэшни хүсѳѳрѳѳ татахада таһаршадаг һур дээһэн бэшэ, тэрэшни ондоо байдаг юм (Х. Намсараев); жэжэ зарга хоб хошо, хоб жэб (кляуза); зарга бариха (гү, али зааха) гомдол бариха, хэн нэгэндэ сүүдтэ нэхэбэри үгэхэ (подавать жалобу, предъявлять судебный иск к кому-л.): Яабашье ѳѳрынхиеэ абажа һалахаб, хаанда хүрэтэр зарга барихаб (Б. Санжин, Б. Дандарон); зарга таһалха (гү, али хэхэ) сүүдтэ үгтэһэн гомдол шүүжэ үзэхэ, зүбшэн хэлсэхэ (разбирать тяжбу): Шимни ямар зарга таһалха болоод, хүнгэн хубсаһа үмдэхэеэ һанабаш? (Х. Намсараев); …тэрэ ород буряадаар бэлиндэн, мухар нюдаргаараа хүнүүдэй зарга хэжэ һурашаһан янзатай, мундуу муяагаар аашалан, орожо ерэһэн гурбан һамгадые эршэгыдэнэ (Ц.-Ж. Жимбиев); зарга хэрүүл ама хэлэнэй хараал, хэрэлдээн, арсалдаан, зүрилдѳѳн (ссора, раздоры, ругань): Шимни үргэ амандаа шаташанхай, зарга хэрүүлдэ бэрхэ хадаа эхилэ. Зүгѳѳр дан үлүүсэ гарахагүйш, хэм соохононь хэрэлдэхэбди, зүү? (С. Цырендоржиев).