ЗАЛАХА II

үйлэ ү. 1) уриха, ерэхыень гуйха, үндэр айлшаниие гэртээ урижа асарха, оруулха, хүндэлхэ (приглашать, просить пожаловать, привозить к себе знатного гостя): Энэ үеын нэгэ үдэр Бадма абгай Даржаа габжые залажа, жаһаа сахюусаяа, баһа амгалан байдалай тулада гэжэ хэдэн заһал гүрэмүүдые уншуулжа байба (Х. Намсараев); шэрээдэ залаха шэрээдэ һуулгаха, хаан болгохо (водрузить на престол): Дундада зуунай үеэр ород тайжанар викингнүүдые хаан шэрээдэ залаһан түүхэтэй; 2) шухала, нангин, үнэтэ юумэ асарха (привозить культовый или почитаемый предмет): Хуби заяатай байһандаа хорин табан түхэриг алтаар арай гэжэ залажа ерэбэб (Х. Намсараев); аршаан залаха а) аршаан булагһаа уһа асарха, жэшээнь, Алханын хадаһаа (привозить аршан); б) дасанһаа арамнайлуулһан уһа (аршаан) асарха (привозить освящённую воду-аршан из дацана); эм залаха эмшэ-ламаһаа эм абаха (получать лекарство у лекаря-ламы): – Ламбагай, энэ хүбүүмни һүниндѳѳ халууржа хоноо. Толгойнь халуун. Эм залажа хайрлыт, – гээд мүнгэн бугаагаа абаашажа, ламын урда табиба (Ч. Цыдендамбаев); 3) хүндэлхэ, ама хүрүүлхэ (угощать): Тиихэдэнь Жарантай хутагаяа һугалжа, журам ёһоорнь тѳѳлэй баряад, һүншэн хүбүүндэ залаба (Б. Санжин, Б. Дандарон); Үбгэн аба газарта дабшалан һуугаад, үбэрһѳѳ хусын хууханаг алшуураа гарган, урданай ёһоор залана. – Танилсаад, тамхияа татадаг юм гэлсэгшэ (Ц.-Ж. Жимбиев).