УУЛЗАБАРИ

юум. н. ямар нэгэн юумэнүүдэй бэлшэр, ниилэһэн газар, уулзадха, уулзадаһан (стык, граница): Хүлтэй тайжа хүйхэр / Манзан-Гүрмэ төөдэйhөөн / Заабаритай ябаhаар, / Эсэгэ-Малаан баабайhаан / Захяатай гараhаар, / Тэнгэри газар хоёрой / Тэг дунда орожо, / Нара hара хоёрой / Уулзабари дээрэ хүрэбэ (Гэсэрһээ); үхэл түрэл хоёрой уулзабари дээрэ амитай амигүй хоёрой забhарта, үхэлэй богоһо алхаха туйлда, үхэл амидын эрмэг дээрэ (между жизнью и смертью): Атай-Улаан тэнгэриин / Зүүн гарынь шууяжа, / Yлгэн дэлхэйдэ унахадаа, / Yнсэг дайдада буухадаа, / Yхэл түрэл хоёрой / Уулзабари дээрэ тогтожо, / Шэрэм-Минаата хаан – / Анахай боложо талииба (Гэсэрһээ).