УРЯАЛХА

үйлэ ү. 1) хандаха, дэмжэхые гуйха (призывать): Энэ дайшалхы ябуулгань саашадаа хүбүүдтэнь һайн нүлөө үзүүлжэ, шэн зоригто хэрэгүүдтэ уряалжа байхань дамжаггүй (Б. Шойдоков); 2) ямар нэгэ юумэ хэхые, ерэхые, айлшалхые дуудаха, дурадхаха, ерыт гэхэ, айлшалыт гэхэ, уриха (звать, приглашать): Үглөө эртэ улаан наранаар таладаа гаража, уйтай аянгатай ута гэгшын дуунуудые дууладаг, тэдээн соогоо урин һайхан нүхэрөө бусажа һөөргөө ерэхыень уряалдаг бэлэй (А. Жамбалдоржиев); уряалха даллаха уриха, ооглохо, зонхилхо, дуудаха (приглашать, звать, манить): Намсалмаа болон бусад түрүүшүүл маниие уряалжа даллажа байһан галта маяк ха юм (Ц. Шагжин); һуухые уряалха һуухые дурадхаха, дуудаха (приглашать сесть): Эдэ хоёртой гараа барилсажа мэндэшэлэлсэһэнэй һүүлдэ Банзанов тэдэниие столой дэргэдэ һуухыень уряалба (Б. Мунгонов).