УНЖАГАЙ

тэмд. н. ута, удаан, удаарһан, удаһан, үни саг соо үргэлжэлһэн, ужаг (продолжительный, затяжной, нудный): Гэр сооһоо шэбэнэлдэһэншье һаа, ямаршьеб таахада, унжагай хөөрэлдөөн дуулдажа, Жамбал абяагүй болошобо (А. Жамбалдоржиев); унжагай ута (гү, али ужаг) ута, удаан, үни саг соо үргэлжэлһэн (продолжительный): Тиигээд хоёр минута болоһон хойно ой соо унжагай ута хүнхинөөн болоно: хаанаа эхиниинь, хаанаа эсэсынь гээшэб гэжэ ойлгохо аргагүй (Ж. Тумунов); Эдеэлжэ һуухадаа олон үгэтэй эхынгээ захагүй унжагай ужаг үгэ заатагүй шагнахал эрхэтэй болоно (Ч. Цыдендамбаев); Юундэб гэхэдэ, намарай заха үзэгдэхэтэй адли унжагай ута бороо болохо (Ц.-Ж. Жимбиев); унжагай бороон ужаг, удаарһан бороон, олон хоногто ороһон бороо (затяжной дождь): Намарай унжагай бороогой һүүлээр, ябажа болошогүй шабар шабхатай үйлсөөр хэншьеб ехэл яаралтайгаар хотоной урда захаһаа хойшолбо (Ц.-Д. Хамаев); ○ ужаг, ута гэжэ үгэнүүдтэй парн. хэрэгл.