УНТАРААХА

үйлэ ү., идх. залог 1) гал носохыень болюулха, сараха, һүнөөхэ, унтаргааха (гасить, тушить): Утаа бадхуулан ууяһан сусалнуудые, улаан согуудаа обоолоод, харлатар сохижо, унтараабад (С. Цырендоржиев); түүдэг унтарааха түүдэгэй гал һүнөөхэ, носохые болюулха (тушить костёр): Гал түлиһэн газарһаа дүтэхэнэ нэгэ тохой олоод, һөөргөө бусажа, түүдэгээ унтараагаад, сусалнуудыень иишэ тиишэнь шэдэбэ (В. Гармаев); 2) зайн гал гү, али ямар нэгэн оньһо ажаллахыень болигохо (выключать): Зугадажа шадахаяа болёоб гэжэ мэдэхэдээ, мотоороо унтараагаад, рюкзак парабеллум хоёроо далай руу хаяад, үбдэгсөө уһан соо хүл дээрээ бодожо, дурата дурагүйгөөр гараа үргэбэ (Б. Мунгонов); зайн гал унтарааха зайн галаар ажалладаг дэн аһахые болюулха (выключить свет): Үбгэжөөл зайн гал унтараагаад, хүгшэнэйнгөө хажууда ошожо һууба (С. Цырендоржиев); трактораа унтарааха тракторай моторой хүршэгэнэхые болюулха (глушить двигатель трактора): Дугардаан гэрэйнгээ урда трактораа байлган зогсоогоод, унтарааһан бэеэрээ һуури дээрэһээ һүрэн бууба (Ц.-Ж. Жимбиев); 3) шэлж. үгы болгохо, болигохо, бадаруулангүй дараха (не давать развиваться чему-л.): Харин хүнэй сээжэ соо бадарһан дурлалые унтараажа болохогүй гэжэ би найдадагби (Ч. Цыдендамбаев); һэжэг унтарааха һэжэгые тарааха. һэжэглэхыень болюулха (развеивать подозрения): Гар гараа барисалдажа эхилһэн иимэ эбтэй байдалынь Нинын бүхы һэжэг унтараажа, ямаршье үгэһөө үлүүгээр эдэнэй бэе бэедээ дуратайе тодоруулба (Ч. Цыдендамбаев); хэрэгые унтарааха хэрэг болюулха (замять дело): Шэнэ онсо баримтын олдотор энэ хэрэгые даб дээрэ унтарааха гэһэн удхатай документ бэшэгдэбэ (Ч. Цыдендамбаев).