УЙДАХА

үйлэ ү. гуниглаха, гунигта абтаха, гунигаар эзэлэгдэхэ, гажарха, уйдхарлаха (грустить, тосковать, печалиться): Эжэл нүхэдһөө таһаржа, эльгэн дайдаһаа холодоһон залуухан харсага айхабтар ехээр уйдажа, нютаг ороноо һанана (Ч. Цыдендамбаев); уйдаха гашуудаха (гү, али муудаха), уйдан гажарха гуниглаха, гунигта абтаха, сэдьхэлэй үбшэн болохо (печалиться, тосковать): Үтэлжэ, үмхи яһан болоошье һаа, хүгшэнэй зүрхэ сэдьхэл уйдаха гашуудахые, урмашаха хүхихые алдаагүй зандаа бшуу (С. Цырендоржиев); Тугаарай сакманщик хүбүүнтэй хөөрэлдэжэ уруу дуруу болоһон, уйдаһан муудаһан Рабжаевай зосоо байн байн гэрэлтэй һаруул боложо захалба (Б. Мунгонов); Сэмбэл уйдан гажаржа, урданайхидал мэтэ хүхилдэн хөөрэлдэхөө болёод, бүдэхи аалин ябана (М. Осодоев).