УХААГҮЙ

тэмд. н. ухаансар бэшэ, һүлэр ухаатай, ухаагаар муу, гэнэхэн (неразумный, бестолковый, глупый): Ухаагүй хүн лэ ехэ юумые мэдэхэб, юушьеб, ямаршьеб юумэ сүм ойлгооб, мэдээб гэжэ үнэнхэ зүрхэнһөө ойлгожо, бусад зондо дээрэлхүүшэгээр хандадаг юм гэжэ нагаса эжымни баһа хэлээ һэн ха (Ц. Цырендоржиев); мэдээ ухаагүй а) мэдэрэлгүй, мэдээ алдаад, харанхалаад (без сознания): Эрдэни гулваа … муухай хара шүдэ харуулаад, нюдөө хилайжа, түргэ түргэн амилжа, мэдээ ухаагүй хэбтэнэ (Х. Намсараев); б) юумэ ухаалдингүй, ойлгонгүй, хараһан тээшээ (сломя голову): …шаргатайнь шаргадаа һуужа, ябаганиинь ябагаараа иишэ тиишээ мэдээ ухаагүй гүйлгэлдэжэ, гүйлдэжэ тарашанад (Х. Намсараев); ухаагүй унаха түнх. харанхалха, харанхалжа унаха (терять сознание); ухаагүй толгой улаан гараа зобоохо (О ньһ. ү.) бодомжогүйгөөр юумэ хэжэ бэеэ эсээхэ (≈ бестолковая голова ногам покоя не даёт): – Ухаагүй толгой улаан гараа зобоохо гэжэ тэнэг уладта хүдэлмэри барагдаха юм бэшэ, – гэжэ бэедээ хэлэнэ (Ц. Дон); урагшагүй зондо ухаагүй ноён дайралдаха (О ньһ. ү.) ямар нэгэн юумэ хэхэдэ бүтэсэгүй гү, али азагүй байха (невезучим людям – глупый начальник).