ТУРШАХА

үйлэ ү. 1) мэдэсэ абахын тула ямар нэгэн юумэ бодото дээрэнь хэжэ үзэхэ, хэжэ үзэхые оролдохо (пробовать, пытаться): Буда түрүүлэгшэтэеэ хөөрэлдэжэ, эб зүбыень олохо гэжэ Жалуур хэдэн дахин туршаа, теэд тэрээнһээнь юуншье гаража үгөөгүй (Ц. Шагжин); туршаад үзэхэ хэжэ үзэхэ (пробовать): – Шуһа мяханһаамни таһарһан ганса хүбүүнэйнгээ тала хаража, туршаад үзэхэл болобо гээшэ бэзэб даа (Б. Мунгонов); хүсэеэ туршаха өөрынгөө хэды шэнээн шангые мэдэхын тула хүсэ гаргажа үзэхэ (испытывать свои силы): Бүхэ Баалга хүсэеэ туршажа, энэ томо шулуу холоһоо тэбэрижэ асараад, тэрэ багахан шулуун дээрэ дабхасуулжа табиһан домогтой (Б. Мунгонов); 2) амта мэдэхын тула ямар нэгэн юумэ эдижэ гү, али уужа үзэхэ, амталха (есть или пить для пробы, чтобы определить вкус): Энэ мэтын архинуудые туршажа үзэһэн аабзат! (Д. Батожабай); 3) шэлж. зорёолон һагад хэлэхэ, хорынь малтаха, наадажа хэлэхэ (специально поддразнивать, нарочно говорить, подшучивать): Эдэнэр намайе наадалжа, туршажа, нэгэ муу юумэдэ оруулхаяа байна гү гэһэн муу һанал Нинын сэдьхэлдэ түр зуура ороодхино (Ч. Цыдендамбаев).