ТООЛУУР

юум. н. 1) тэбхэр модон рамада хэдэн ряд яһахануудые арба-арбаар түмэртэ үлхэжэ һуулгаһан тоолодог хэрэгсэл, шоото (счёты): Калькуляторай үшөө бии болоодүйдэ һургуулиин үхибүүдтэ гэжэ хэгдэһэн багахан тоолуурнууд наймаада гарадаг һэн; 2) бодолгын дүрбэн үйлэ болон алгебраическа формулонуудай үйлэ хэдэг сахим тоололгын оньһон (калькулятор); 3) тоолодог хүн, тоолохоор томилогдоһон хүн (счётчик): Һая үмсын малай тоолуур ябаа һэн; 4) будд. эрхидэ хэгдэһэн зуу маани тэмдэглэдэг үлхөөтэй арбан яһаханууд; модооршье, яһааршье, мүнгөөршье хэгдэһэн байжа болодог (счётчик на чётках): Үбгэнэйнгөө мүрэ дээгүүр бүгтэрүүлээд байһан, алтан бэһэлигтэй гарһаань мүнгэн тоолууртай хара зандан эрхи һанжана (Ж. Балданжабон); 5) хүүгэдэй арадай аман зохёолой бага жанрнуудай нэгэн, хүүгэдэй нааданда ямар нэгэн хүниие һунгахада хэлэдэг тобшохон шүлэг. Жэшээлбэл, Нэгэн, хоёр, гурба / Нэрэ шинии хэн бэ? / Найма, юhэ, арба, / Наhан шинии хэды бэ? / Хэлыш, хэн гээшэбши, / Хэды тоо мэдэхэбши? (считалка, один из малых жанров устного народного творчества): Түрэл буряад хэлэмнай баян даа. Оньhон үгэнүүд, жороо үгэнүүд, таабаринууд, тоолуур, шог зугаа нааданууд, шүлэгүүд гэхэ мэтэ бии (infourok. ru); 6) шэлж. мүнгэн (деньги): Мүнөөхи тоолуурнай хэлсээтэй аад, хара сайтай һуунабди.