ТИТИМ

юум. н., хууш. 1) дээдэ изагууртанай үмдэдэг малгай, ямар нэгэн конкурс илагшадай толгойн һүлдэ шэмэг (корона, венец, диадема): Хайрата һайхан дүүмни хаанай титим үмдэжэ, мандал үргүүлхэ ёһотой (Ц. Дамдинжапов); Дангинын титим Айна Доржиева Дари Бадмаева хоёрто хүртэжэ, Зоригто Нанзатов Барас Дайндаров хоёр 2018 оной Баатарнууд болобо (minkultrb. ru); титим малгай толгойн һүлдэ шэмэг (корона): Урдаһаамни ямар нэгэн титим малгай үмдэнхэй хүбүүн энеэбхилэн байба (Ц.-Ж. Жимбиев); 2) ламанарай үмдэдэг бурханай зурагтай, табан сэхэ дээшээ шэглэһэн һарабшые хоорондонь утаһаар хэлхиһэн малгай (ламский головной убор с пятью зубцами с изображениями пяти будд); 3) монгол бэшэгэй аялган абяанай эхиндэ ородог тэмдэг (коронка, элемент монгольской графики); 4) хэргэм, соло тэмдэглэһэн тэмдэг (титул): ялагар талагар титимүүд.