ТЭРЛИГ

юум. н. 1) зунай сагта үмдэдэг, гадар дотор хоёрыень бүдөөр оёhон үхибүүдэй, бүhэтэй хүнэй болон эхэнэрэй дэгэл. Гэр зуура үмдэхэ тэрлиг үнэгүй бүдөөр оёхоhоо гадна, үнэтэй хургы торгоор зэмсэглэн гоёодоггүй байгаа. Жэшээнь, хүхэ даалингаар оёбол, энгэрыень ондоо үнгэтэй зузаабтар бүдөөр гү, али хара хилэнгээр хүбөөлөөд орхидог байгаа. Гоёлой тэрлигүүдые элдэб үнэтэй торгоор оёжо, үнгын хоргой болон хилэнгээр гоёодог hэн. Оёгдоhон эдэйнь нэрээр зунай дэгэлнүүдые нэрлэдэг байhан юм (лёгкий летний халат на матерчатом подкладе): Теэд мүнөө хүхэ тэрлиг дээгүүрээ ялагар шара горьётой, хүрин булгайр бүһэ бүһэлэнхэй, үбсүүн дээрээ улаан значок хаданхай – амаргүй һүртэйгөөр харагдана (Ц. Шагжин); шэршүү тэрлиг элдэб сэсэг болон хээгүй нимгэн хитад торгон тэрлиг (летний халат из чесучи): Тэдэнэй hүүлээр уужамдад гэhэн сагаан шэршүү тэрлигүүдые шагтиитар бүhэлhэн хүл жорхой хоёр хүбүүд гаража, үүдыень сэлеэд, хоёр тээнь зогсобо (Б. Санжин, Б. Дандарон); түхэреэн хээтэй торгон тэрлиг нэгэ үнгын торгон дээрэ өөрhөө гараhан, мүн үнгын гү, али алталмал утаhаар нэхэн гаргаhан үндэhэн аягын амhарай зэргэ түхэреэнтэй торгоор оёhон тэрлиг (шёлковый халат с круглым узорчатым рисунком): Тэдэнэй дунда Бадан Тураахиин түхэреэн хээтэй хүхэ торгон тэрлиг үмдэнхэй түрүү зэргэдэ hууна (Б. Санжин, Б. Дандарон); магнал тэрлиг алталмал, мүнгэлмэл утаhаар луу хээ гаргажа нэхэгдэhэн зузаан торгоор оёhон тэрлиг (летний халат, сшитый из шёлка с рисунком дракона, вышитым золотистыми и серебристыми нитями): Шэтын вокзалай перрон дээрэ халюу булган малгайтай, номин шүрэ дэнзэтэй, үүлэн соогуур хотиролдожо хэбтэhэн луу хээтэй магнал торгон дэгэлтэй буряадууд үймэлдэнэ (Ж. Балданжабон); буха магнал тэрлиг зузаан, hайн шанартай магнал торгон тэрлиг (плотный, хорошего качества шёлковый халат): Халтал нюдэнэйнь анилдахатай сасуу, хаанаhаашьеб буха магнал тэрлигтэй Сандан ноён урдань бии болоод лэ… (Ж. Балданжабон); хамба торгон тэрлиг өөрhөө гараhан томо түхэреэн хээтэй, зузаан, нэгэ үнгын хитад торгоор оёhон тэрлиг (летний халат из китайского шелка с узорчатым круглым рисунком): Хамба торгон дэгэлтэйб, хазаан тэргэ hуудалтайб, нугаар, талаар гүйдэлтэйб… (Ж. Балданжабон); 2) будд. ламын хубсаhан, гэнин гэдэг доодо шатын hахюуhатан имагтал хүри улаан тэрлиг үмдэхэ ёhотой байгаа. Харин гэсэл, гэлэн гэдэг hахилда хүртэгшэд иранга, шантаб, орхимжо гэhэн номой хубсаhа үмдэхэ эрхэтэй байhан (тэрлик).