ТЭГШЭЭР

наречи 1) хэлтынгүйгөөр, найгалзангүйгөөр, сэхээр, жэгдээр (прямо, ровно): Үбһэ хуряалгын үедэ сабшажа байһан мүрөө бүри алдангүй, тэгшээр сабшаһыень харахадаа баясаа һэн (М. Осодоев); тэгшээр тээхэ алишье тээшээ хэлтыхэгүйгөөр, унахагүйгөөр ашаха (ровно грузить): – Тэгшээр тээгээрэй, – гэжэ басаган тээшэ хилам гээд, асалжа оробо (Б. Шойдоков); 2) адляар, илгаагүйгөөр, хахадаарнь (поровну, одинаково, в равной степени): Тиимэһээ тоонто һайхан газарнай хүбүүдээ эжы мэтэ хурылан угтажа, наһанайнгаа жаргалые бултадаа адли тэгшээр эдлэһэй гэһэншүү баян хэшэгээ дэлгэдэг гэхэ (М. Осодоев); Дэлхэйе наран тэгшээр шарадаггүй юм, зониие ноён адляар харадаггүй юм (Оньһ. ү.); тэгшээр хубааха адляар хубааха (делить поровну): Хотон соо тэрэ дороо буруу татаһан шоные Заяаханай алаһан тухай дуулдажа, түрүүлэгшэ ерээд, мяхыень айлнуудта тэгшээр хубаажа үгэгты гэжэ захираад ябаа һэн (Ц.-Д. Хамаев).