ТЭБХЭР

1. тэмд. н. 1) дүрбэлжэн, дүрбэн булантай, тэбхэгэр (квадратный, прямоугольный): Мүнөө харахада, отог оргой болотор малтаһан газартамни тэбхэр тэбхэр шулуун гэрнүүд бодонхой (З. Гомбожабай); тэбхэр тобхор (гү, али табхар) багахан тобхогор (квадратный, прямоугольный): Тэндэ олон тэбхэр тобхор хайрсагууд табяатай, тэдээн дээгүүр, мүн газарааршье жаахан номо һаадаг болон буунуудһаа эхилээд, хониной шагайнууд хүрэтэрөө элдэбын нааданхайнууд дүүрэн хэбтэбэ (Б. Мунгонов); Тэрэ үеын Y шөөтэй нютагта эндэ тэндэ тэбхэр табхар эшэгы гэрнүүдшье харагдагша һэн (А. Шадаев); тэбхэр модон зургаан самсаалтай болгон, гонзойлгод гэжэ отолһон модон (брусок дерева); тэбхэр хээтэй дүрбэлжэн хээтэй, дойбод, тэбхэлжэн эреэн (клетчатый – о ткани); тэбхэр шугамтай дүрбэлжэн хубинуудһаа бүридэһэн (в клетку – о тетради); тэбхэр нюур үргэн магнай, үргэтэй нюур (квадратное лицо): Харин тэрэниие угтаад, сарайн саанаһаа уйтахан нюдэтэй, тэбхэр улаан нюур бултайба (Д. Батожабай); тэбхэр хуурай дүрбэн самсаалтай эржэгэр түмэр үрэбтэр (четырёхгранный подпилок); тэбхэр хара сэл. хабтагар хэсэгүүдээр хатааһан сай (плиточный чай в виде квадрата с дольками); 2) багжагар, тугжагар, шиираг, бүхэ бэетэй, үргэн мүрэтэй, ханхагар (коренастый, крепкий, широкоплечий): Сэрэгэйхеэр хубсалһан, үндэр тэгшэ бэетэй, үргэн ээмтэй тэбхэр хара хүбүүе харажархихадаа, Балжид нюдэеэ гансата ехэ болгожорхибо (Ц.-Д. Хамаев); 2. наречи яг, эгсэ, бүхэли (ровно): Балшар бишыхан хоёр хүбүүдэй һургуулида оротор тэбхэр жэл үлөөд байгаа (С. Цырендоржиев); тэбхэр гурбан сагта эгсэ гурбан сагта (ровно в три часа): Тэбхэр гурбан сагта, жаахашье хожомдонгүй эндэ байхаб (Ч. Цыдендамбаев); тэбхэр һара үнгэрбэ яг, бүхэли һара үнгэрөө (прошёл ровно месяц): Бүхы нютагаараа Дэжэд басагые хүдөөлһэн сагһаа хойшо тэбхэр һара үнгэрбэ (В. Гармаев).