ТАТААДХИХА

үйлэ ү., видэй нэгэ түхэл гэнтэ татаха, татажархиха (потянуть): Егерь хүнгэхэнөөр эрьедэ һүрэжэ гараад, Сэдэнтэй хоюулан онгосоёо эрьеын элһэ хайр өөдэ харшаганаса татаадхиба (Б. Мунгонов); зуг татаадхиха гэнтэ тогтоодхихо (резко останавливаться): Хэды тобшо үбсүү руунь тудаба хэбэртэй, пүг-пүг гэһэн абяан дуулдаад, баабгай зуг татаадхиба (С. Доржиев); ама татаадхиха буруу гү, али аягүй юумэ дуугаржа байгаа һаань, зүйтэйхэн харюу үгэжэ, дуугархыень дары болигожорхихо (достойным ответом или репликой заставить замолчать): – Эндэхи ой тайга соо ямар аймшагтай ан арьяатадай байдагые нюдөөрөө харана һэмнэйбди, – гэжэ багшамнай хүбүүдэй ама татаадхиба (Б. Мунгонов).