ТАЛХИ II

тэмд. н. муудаһан, яндан, ялхигар (дрянной, никуда негодный): Хониной саана шүдэртэй ябаһан Бага Алагые хазаарлаад, хадамда гарахадаа тохожо ерэһэн талхи яндан эмээлээ тэрээндэ тохоод… (Ш.-С. Бадлуев); яһан талхи хүгшэрһэн, муудаһан (старый, дряхлый): Гэртэмни баһа намдал адли яһан талхи шабганса байха юм даа (Х. Намсараев); үлхэ талхи иигэн тиигэн, арай шамай (кое-как; как-нибудь): …ехэ наһан гээшэмнай хүндэшэг лэ юм байна даа, тиигэбэшье үлхэ талхи гээд лэ ябажал ябагшаб даа (Х. Намсараев); талхи мохоо а) эригүй, хурса бэшэ (тупой, не острый): Теэд тэрэ бариһан хүрзэнь талхи мохоо аад лэ, газарые арай шамай хагзалан, ехэнхидээ дэмы дээгүүрнь эльбэхэдэл гэнэ (Ц.-Ж. Жимбиев); б) тэнэг, дунгяа, тэншүү, һүлэр (тупой, бездарный): Үгы, юрэдөө, ямар үбэштэй тэнэг, талхи мохоо амитан гээшэб! (Ц. Шагжин).