ТАЙЛБАРИ

1. юум. н. 1) удха, ушар шалтагаае дэлгэрүүлэн ойлгуулжа бэшэһэн ба хэлэһэн юумэн, ойлгуулга, тайлбарилга (разъяснение, комментарий, толкование): Юрэдөө, центртэ ямаршье тушаалда орожо хүдэлөөл һаа, гоё һэн ха гэжэ хорхойтохо зуураа, тээсгэн алтан туруутай тугалнуудые эрьюулжэ зүүдэлһэнэйнь тайлбари энэ ха юм гэжэ шэбшэбэ (Ц.-Ж. Жимбиев); 2) таалга, уридшалан мэдэлгэ (отгадка, разгадка): Зүгөөр Намжал ехэнхидээ урдань хүлеэжэ байгаа ажабайдал тухайгаа, өөрынгөө энэ шэнэ, тиимэ һэн тула һонирхолтой, бэлэншье һаа, тайлбарииень мартажархиһан таабари мэтэ ажал хүдэлмэри тухайгаа бодогшо һэн (К. Цыденов); 3) нэмэлтэ заһабари оруулһан ажаглалта (оговорка); 2. тэмд. н. үгын удхые дэлгэрүүлэн тайлбарилһан толи бэшэг (толковый): Иимэрхүү үгэнүүдэй нэмэри шангадхаһан удхые тайлбари толи соо тэмдэглэбэл зохистой байгаа гэжэ һананабди (Ц. Бальжинимаева).