ТАБИЛСАХА

үйлэ ү., хамтадх. залог 1) ямар нэгэн юумэ тааруулалсаха, тодхолсохо (совместно ставить, устанавливать): Тэрэнэй хажуугаар арбаадтайхан гү гэхээр басаган эхэдээ хамһалсажа, хүнгэхэнөөр хүдэлэн, эжынгээ үгөөр табаг табилсана, сай аягалалсана ха (С. Норжимаев); бухал табилсаха мүртэй үбһэнүүдые багашаг хэмжээгээр сомон обоололсохо (помогать ставить копны): – Эй, халагни халаг, Сэсэгые бухал табилса гэхэ юм аад лэ, харатайгаар мартабаб (Х. Намсараев); гар табилсаха дэмжэһэнээ гэршэлжэ, нэрэеэ бэшэжэ баталалсаха (совместно подписывать): Энээндэтнай үбгэд хүгшэдшье һаа түрүү барилсажа, гараа табилсахал хэрэгтэй байна… (Х. Намсараев); төөлэй табилсаха бэе бэеэ хүндэлһэнэй тэмдэг болгон төөлэй үгэлсэхэ, абалсаха, хүндын үгэ андалдаха (угощать друг друга бараньей головой): Төөлэйгөө табилсажа хуримлаха гэһэн... (Х. Намсараев); 2) баригдаад гү, али хаагдаад байһан хүниие, юумые табихада хабаадалсаха (вместе отпускать, выпускать): Харагшанай «гурба» гэхэтэй сасуу хүбүүд табилсабад (Ч. Цыдендамбаев); уһа табилсаха хамта уһа урадхуулха (помогать пускать воду): Тиимэһээ Эрдэмтын ханаабһаа уһа табиха арга олоһон хүн бүхэн дуһал балгашье һаань, Аюуханай сабшалан тээшэ табилсадаг байба (Ч. Цыдендамбаев).