ТААРАЛДАЛ

юум. н. зохилго, таарама байлга (гармония, соответствие, сочетание): Шэлэн абалгын эрилтэнүүдэй нэгэниинь мүрысөөнэй удха, зорилгонууд болон шиидхэхэ асуудалнуудта тааралдал болоно (Н. Шабаев); үнгэнүүдэй тааралдал үнгэнүүдэй бэе бэедээ зохилго, хамтадаа һайханаар харагдахань (сочетание цветов): Үнгэнүүдэй тааралдал буряад дэгэлэй туузын үнгэнүүд дээрэ хараад үзэе. Һамган дэгэл заабол улаан ба шара үнгэнүүдтэй туузатай байха гээд мэдээжэ уран гартан Цыденжаб Цыбикова хэлэнэ (Д. Базарова); аялгануудай (гү, али аялганай) тааралдал хэлэ шэнж. эрэ, эмэ аялгануудые нэгэ үгэ соо бэшэхэгүй, харин эрсэ аялгануудые эдэнэй алинтайншье бэшэхэ ёһо (гармония гласных, сингармонизм): Тус залгалта тодо бэшэ падеждэ байһан һуурида гү, али падежнэ формонуудай хойно хэрэглэгдэхэдээ, удаанаар үгүүлэгдэжэ, аялганай тааралдалай ёһоор хэрэглэгдэдэг… (С. Трофимова); жэлэй тааралдал будд. үбгэ һамган болохо хүнүүдэй жэлэйнь таараха ба үгынь; энээниие лама тодорхойлдог. Жэлнүүд тааралдана гү, али үгы гү гэжэ гансал гэр бүлэ бололгодо хараха бэшэ, харин хурим түрэ, ойн баяр, хүниие хүдөө табилга гэхэ мэтэдэ гол зонхилхо хүнэй жэлынь тэрэ тэмдэглэгдэжэ байһан хүнэй (жэшээнь, наһа барагшын) жэлтэй таараладана гү гэжэ хараха ёһотой (сочетание годов): Урдандаа наһатайшуул хүбүүнтэйнь тааралдалые мэдэхын тула заабол басаганай жэлые һурадаг байгаа.