ТҮЛҮҮЛХЭ I

үйлэ ү., идх. залог 1) юумэнэй түлөө мүнгэ гү, али эд зөөри үгэхые баадхаха, нэхэхэ (заставить платить, взыскивать): Хуулиин зэргээр хандаха болоо һаа, зэмэтэниие заатагүй хэһээхэ, үхэһэн адуунай үнэ сэнгые түлүүлхэ ёһотой юм бэзэ (М. Осодоев); алимент түлүүлхэ ажал хэхэ шадалгүй, амяараа байдаг үхибүүдтээ, түрэлхидтөө хууляар мүнгэ үгэхые баадхаха (взыскивать алименты): – Алимент түлүүлхэ гэжэ бэдэрhэн бэшэг нүхэршни нюугаад, намда шал худалаар хэлээд байна, – гэжэ Сэрмаа сэсэрхээд, нюдөө үзүүрлэн, үбгэеэ хараба (Г.-Д. Дамбаев); 2) юумэнэй түлөө мүнгэ гү, али эд зөөри үгэхэ баатай болохо (быть обязанным выплатить): Үнгэрэгшэ үдэшэнь нүхэдэй сүүд боложо, Балданай жэжэ-бужа хэрэгүүдые хаража үзөөд, донгодолготойгоор арбан түхэриг яла түлүүлхэ гэһэн байгаа (Ц.-Д. Хамаев).