ТҮХӨӨХЭ

үйлэ ү. 1) дэлгэрүүлхэ, тарааха, сасаха (распространять): Бальжама абгай үхэрэй тагалсаг хуухалан, гашуун хүншүү гарган һуухадаа, тэдэ хоёр хүбүүдтээ һургаал номнолоо түхөөн, үнөөхил урданайнгаа юумые дурдажа ороно (Ц.-Ж. Жимбиев); хүн бүхэндэ түхөөхэ хүн бүридэ хүртөөхэ, тарааха (раздавать каждому): Хэдэн залуухан хүбүүд аягатай сэгээнүүдые түрүүн Абжаа-удаганда, удаань Тураахида баряад, саашань хүн бүхэндэ түхөөнэ (Б. Санжин, Б. Дандарон); гэрэлээ (гү, али туяагаа) түхөөхэ гэрэлээ сасаха, адхаха (заливать светом, обливать лучами): Хүхэ майхан огторгойн баруун урда тоонодо нажарай шанга наран хайлуулмал алтан шэрээдэһээр бусалжа, оёоргүй гүнзэгы юртэмсэ худар галдуулма халуун гэрэлээ түхөөнэ (Б. Мунгонов); Тэрэ мүнгэн туяагаа сэнтэнги модод, хорёогой һургааг, гэрэй хушалта, сарья харгы, колхозой амбаарнууд, дайнай эхилхэһээ хойшо баригдахаа болишоһон гэрэй шэнэ хананууд дээгүүр түхөөнэ (Ж. Тумунов); 2) шэлж. бэлэглэхэ, үршөөхэ, барюулха (одаривать): – Гомдолтойнь гэхэдэ, хайрата инаг хүгшэмни, бишни шамдаа зол жаргал түхөөжэ шадаагүйб, шамһаан холо байгааб (М. Осодоев); бэлэг шагнал түхөөхэ бэлэг шагнал хүртөөхэ (удостаивать подарков и наград); бэлэглэн түхөөхэ бэлэг үгэхэ, барюулха (одаривать).