СООГУУР

дахуул ү. 1) ямар нэгэн юумэнэй дотор талаар, досоогуур, дундуур, һэтэ, ото (по, через, сквозь, в): Харгын хоёр тээгүүрхи хобоо хонхор соогуур харьялаа уһанай хөөһэтэй хурдан урадхал үдэр бүри улам нэмэнэ (Ц.-Д. Хамаев); тайга соогуур тайгаар, тайга газараар (по тайге): Арха барха үдхэн мүшэртэй томо хуша доро залиржа байһан түүдэгэй утаан ууяжа, тайга соогуур унайн үнэр тараана (Д.-Д. Дугаров); гэр соогуур хараашалха бүхы гэрээр бэдэрхэ, гэрэй эндэ-тэндэ хараха (искать по всему дому): Удаань тэрэ гүйжэ бодоод, гэр соогуур хараашална (Ч. Цыдендамбаев); (хүн) зон соогуур хүн зоной дундуур (среди людей, среди толпы): Цэрэнпил улам саашаа зон соогуур зүдхэжэ, худхалдан ябана (Х. Намсараев); Тиигэжэ Дагба һаадгүй хүн зон соогуур тэгүүлэн, сэргын дэргэдэ ерэбэ (Ц. Шагжин); коридор соогуур ябаад, газаа гарашаха коридор һэтэ ябаад газаа гарашаха (пройдя по коридору, выйти на улицу); 2) ямар нэгэ сагай туршада, хугасаанда, дотор, үедэ (во время, в течение, в): Машина-булуудхаяа заһаһан Дабаа-Жалсан март һара соогуур Сандахынгаа Адагһаа машинаараа гараад, Дээдэ Юрөө худар үнжөөд лэ гүйлгэжэ ошодог болобо (Б. Мунгонов); аадар бороон соогуур аадарлажа байхада, аадарай үеэр (во время ливня): Тиихэдээ нилээдгүй орой, харанхы болоһон хойно аадар бороо соогуур һаалгаяа дүүргээ болобод (Ц.-Ж. Жимбиев); найр наадан соогуур найрай боложо байхада, нааданай сагта (во время празднества): Харин һабһаг болгоһон энэ найр наадан соогуур ямаршье хүндэ ажал хэһэнһээ үлүүгээр эсэһэн янзатай (Б. Мунгонов); шууяан соогуур шаг шууяанда, дуу шуунда (сквозь шум): Таниин хэлэһэн үгые шууяан соогуур дуулаһан Доржын дотор тон ондоо, тон жэгтэйхэн болошобо (Ч. Цыдендамбаев); байлдаан соогуур тулалдаан боложо байхада, дайлалдаанай үедэ (во время боя): Байлдаан соогуур унаһан хүбүүдээ тэдэ ой руу гүнзэгырэн ороод хүдөөлүүлөө (Б. Шойдоков); һайндэр соогуур гэртээ ошоод ерэхэм һайндэрэй үдэрнүүдтэ гэртээ ошоод ерэхэм (на праздники я хочу съездить домой).