САНГАРИЛ

юум. н., будд. 30, 40, 50 зон хэн нэгэнэйдээ суглараад, үдэшын нара орохо багһаа эхилээд, үглөөнэй нара гараха болотор бүхэли һүни соо маани уншалга; түбэд хэлэндэ «бүхэли һүни» гэһэн удхатай. Арьяа- Баала бурханай зүрхэн тарни болохо «ум-ма-ни-бадмэ-хум» гэжэ мааниин зургаан үгые эхэ болоһон зургаан зүйл хамаг амитанай туһын тула ба хойто наһандаа һайн түрэл олохын тула уншадаг юм. Сагаан һарын үедэ, мүн һарын гурбан дүйсэн гэдэг найман шэнэ, арбан табан ба гушанда онуулан тудуулжа, сангарил хэдэг (сангарил, групповой обряд буддистов мирян): Сангарилайнь үглөөдэр бригадир Сандаг конторо соогоо эрэшүүлые суглуулаа һэн (С. Доржиев).