САЛИН I

юум. н. хүдэлһэнэй түлөө абаһан мүнгэн, хүлһэн (зарплата): Баабаймни һургуулида сторожоор хүдэлжэ олоһон салингаа суглуулжа, Доодо-Голой Цымпил гэжэ хүнһөө нэгэ хүригшэ гүү худалдажа абаад, айл шэнги унаха моритой болоо һэмди (Ц. Шагжин); салин хүлһэн (гү, али түлөөһэн) хүдэлһэнэй түлөө абаһан мүнгэн (заработная плата): Өөртөө сэн нэмээжэ, гүрэнэй салин хүлһэ дэмы эдинэгүйб гэжэ харуулхые оролдоно гээшэ (Б. Мунгонов); һарын салин нэгэ һара хүдэлһэнэй түлөө үгтэдэг хүлһэн (месячная зарплата); сагай хэмжээгээр үгтэдэг салин хэды шэнээн саг хүдэлһэн, тэды шэнээн түлэгдэдэг хүлһэн (почасовая оплата); хэһэн хэмжээгээрнь түлэгдэдэг салин сагһаа бэшэ, хэһэн ажалай хэмжээнһээ дулдыдадаг хүлһэн (сдельная заработная плата); дунда зэргын салин олон хүнэй хүлһэ сасуулаад, дундуурхи хэмжээтэйнь (средняя заработная плата); салин абаха хүдэлһэнэй түлөө мүнгэ абаха, хүлһэ абаха (получать зарплату): Тогоошо хоёр долоон хоног амарангүйгөар хүдэлөөд, майн 1-эй урда үдэр салингаа абахаяа харгышадта эльгээгдэһэн машинаар аймагай түб Петропавловка ошоо һэн (Д.-Д. Дугаров); салин тогтоохо хүлһэ олгохо (назначить зарплату); салин нэмэхэ хүлһэ ехэ болгохо (повышать зарплату); салин хороохо (гү, али хаһаха) хүлһэ бага болгохо (сократить зарплату): Эндэ даажа байһан тушаалһаань үбгэнииень үлэ мэдэг доогууршье оруулаад, эндэ абадаг салингыень бага сага хаһаадшье, Петербург абаашахаяа яана гээшэб? (Ч. Цыдендамбаев); салинһаа дараха хүлһэ хороохо, хороожо абаха, хаһаха (удерживать из зарплаты).