САХИЛГАА(Н)

(н) 1. юум. н. 1) агаарта дээшэлһэн ба доошолһон зайн галай зүришэлдэхэдэ үүлэндэ зурагас гээд, ялас гээд харагдадаг гэрэл; тэнгэриин хаяагаар харагдадаг холын сахилгаанай толон (молния; зарница): Олон асата сахилгаанай нюдэ һаргамаар ялалзахадань, үдэр шэнги гэрэлтэй боложо, ой тайга соо һүйдхэлтэ шуурганай аашалхань аймшагтай үзэгдэл боложо харагдана (Б. Мунгонов); Займнай гал шүдхэрэй гал бэшэ, хамаг зоной гэртэхи газаахиие гэрэлтүүлдэг, гэртэхи газаахи ажалыень хэдэг түмэр утаһан соо суглуулагдаһан сахилгаан гээшэ (Б. Мунгонов); гал ехэ сахилгаан огторгойе хаха зураһан сахигаан (сильная молния); 2) монг. зайн гал, электрын элшэ хүсэн (электричество): агаарай сахилгаан; 2. элирх. үүргээр хэрэгл. сахилгаанда адли хурдан, зурагас гэһэн (молниеносный): Энэ аюул усадхаха хэрэгтэй гэhэн бодол Мэлсын толгойдо сахилгаан түргөөр ороодхибо (Г.-Д. Дамбаев); сахилгаан хурдаар ниидэдэг абяанһаа хурдаар ниидэдэг (сверх-звуковой); сахилгаан түргэн дайн богони саг хугасаа дотор илалта туйлахые хараадуулһан сэрэгэй мэргэн шадабари (молниеносная война); 2) монг. зайн (электрический): Иимэ һаналда эзэлэгдэн һуухадань, баруун ханадахи сахилгаан хонхохон жэнгинэшэбэ (Б. Шойдоков); сахилгаан гэрэл зайн гэрэл, зайн гал (электрический свет); сахилгаан тэргэ электрын элшэ хүсөөр ябадаг унаа (трамвай); сахилгаан утаһан зайн галай утаһан (электрический провод).