САБУУ(Н)

(н) юум. н. юумэнүүдые хоорондонь няалдуулхада хэрэглэдэг бодос, няалдамхай шанартай бодос (клей): Бишыхан пеэшэн дээрэ муухай үнэр танар тараан, ехэ амһарта соо сабуунай палшаганаса бусалха, хүл доогуур харуулай зоргодоһоной торголиг лентэнүүдэй һаршаганаха дуулдана (Ч. Цыдендамбаев); модоной сабуун модоор хэһэн эд няахада хэрэглэдэг зүйл (столярный клей); саарһанай сабуун саарһа няадаг зүйл (канцелярский клей, гуммиарабик); талхан сабуун хүйтэн уһан соо талха зуураад, бусалһан уһа хэжэ шанаһан няадаг зүйл (клейстер); загаһан сабуун загаһанай тамаралгын сууха ба болбосоруулгын үлэгдэлээр хэһэн няадаг зүйл (рыбий клей): Номын эбэр талые эльгэн гэдэг, ара хажуудань малай шүрбэһэ, хуһан модоной нимгэн үйһэ тэнсүүриинь оложо, гүбэгэр болотор загаһанай сабуугаар няадаг (Ж. Лубсандашиев); шара сабуун ялагар сабуун (желатин); эбэр сабуун наһаа хүрэһэн бугын эбэр гү, али хуушарһан яһа бусалган абтаһан няадаг зүйл (клей из оленьих рогов); сабуу билаха наядаг зүйл түрхихэ (намазывать клей); ◊ гартаа сабуутай хулгайша, мэхэшэ, хуурагша (≈ нечистый на руку).