СҮЛХЭ

тэмд. н. эсэдэггүй, эсэшэ сусашагүй, шэрхи, тэсэбэритэй (неутомимый, выносливый): Холын харгыда сүлхэ, эсэхые мэдэхэгүй хатарша хараяа зөөлэн рессортой ходоог тэргэдэ оруулжа хүллөөд, хүнүүдэй балай ябадаггүй боро харгыда оруулжа, урагшалаа бэлэй (М. Осодоев); сүлхэ хатуу (гү, али бэрхэ) эсэшэ сусашагүй, шэрхи, тэсэбэритэй (неутомимый, выносливый); сүлхэ хатуу зоригтой эсэхые мэдэдэггүй, үсэд нэтэрүү, сүхэрэлтэгүй (неутомимый, настойчивый): Тэдэнэр хадаа залан сэхэ һанаатай, жэжэ һэбхи юумые тоодоггүй, уужам дорюун зантай, шэрүүн хүндэ гартай, сүлхэ хатуу зоригтой, тиигээд хамтынгаа хүсые хамагай эрхим зэмсэг болгожо хүмүүжэһэн гайхалтай эмхитэй хүнүүд байха юм (Х. Намсараев); сүлхэ бэрхэ байха эрид шанга, эрид хатуу, зоримгой байха, шуран бэрхэ, зүдхэмжэтэй байха (быть настойчивым, упорным): Тиигээд Гаврюшын хурса бэлигтэй, ажаллахадаа сүлхэ бэрхэ байһандань тон ехэ баярлажа, Гаврюшые хододоо өөрынгөө баруун гар шэнгеэр һанадаг болоһон байгаа юм (Х. Намсараев); сүлхэ сула бажагар, шамбай, бэе һайтай (крепкий, здоровый): Взводой командирай туһалагша үһэгүй, зантагар толгойтой, дан набтар бэшэ аад, сүлхэ сула бэетэй ахалагша сержант Фомин гэгшэ Жамгановта отделениин командирнуудые ганса гансаарнь дуудажа, тэрээнтэй танилсуулба (Ж. Тумунов).