ОШО(Н)

(н) 1. юум. н. 1) шатажа байһан юумэнһээ сасарһан жэжэхэн сог (искра, искры): Һүниин түүдэг хүүен носожо, улаахан ошонуудаа иишэ тиишэнь пишагануулан шэдэлнэ (Б. Мунгонов); ошон гал дүлэтэһэн гал (искристое пламя): Барууни зүгтэ боложо дүүрэһэн дайн байлдаанай ошон галынь һалхинда туугдан ерэжэ, энэ манай байса хадануудай оройгоор түймэр болон носоходол гэнэ (Ц.-Ж. Жимбиев); ошо гаргаха хэтээр сахюур сохижо гал гаргаха (высекать огонь кремнём); 2) шэлж. гэрэлтэһэн ялалзаан (искорки в глазах, на снегу): Шам тухай үгын гарахада, Татьяна Алексеевнагай хасарынь улайгаад, нюдэндэнь айхабтар ондоо, гансал дурлаһан басаганай нюдэндэ харагдадаг ошонууд харагдаа һэн (Ч. Цыдендамбаев); Орон дэлхэйе хушаһан хүр саһан олон түмэн ошонуудаар яларан миралзана (Ц.-Ж. Жимбиев); 3) шэлж. ямар нэгэ мэдэрэлэй һула элирэлгэ, үлэгдэл (слабое проявление какого-л. чувства): Ахынь сэдьхэлдэ атаархалай багахан ошоной аһаашье һаань, гүлмэр гэнэн үхибүүн азатай байгша гэжэ баһа һанан шэбшээд, һанаагаа амараа һэн (С. Доржиев); найдалай ошон һулахан найдал (искорка надежды): Иигэжэ һанахадаа, «агууехэ» найдалаймни һүүлшын ошон заларба хаяа гэжэ хүйтэнѳѳр һанабаб (Ц. Цырендоржиев); инаг дуранай ошон инаг дуранай үлэгдэл (искры любви): Инаг дуранайм ошон үшѳѳ унтараагүй, тэрээниием дэгжээжэ шадаха инаг дуратай хүбүүн бии гэжэ таамаглан мэдүүлнэ (М. Осодоев); 2. элирх. үүргээр хэрэгл. ошондо адли хурдан гү, али хурса (быстрый или яркий, как искра): Ошон түргэн самолёдой / Огсом шэрүүн добтолгоор… (Х. Намсараев).