ООДОН

тэмд. н. 1) богони һүүлтэй, мухар һүүлтэй (короткохвостый): Тэрэ хүбүүнэйнгээ тэнжэжэ, хүдэр һайн хүдэлмэришэн болоходонь, орохо муухан балгааһатай, оодон борогшо гүүтэй, айл шэнги арадаа томогтойхон, үбэртѳѳ сэргэтэйхэн болоһон юм (Х. Намсараев); 2) богони хормойтой (короткополый): Халааһан болошоһон оодон тэрлигтэй, гартаа ута һуртай ташуур бариһан хонишон үбгэн нэгэ һүрэг бүдүүн хонидой хойноһоо һалирна (Б. Санжин, Б. Дандарон); оодон уужа утань доошоо дэгэлэй туузада хүрэтэр, хамсыгүй, дэгэл дээрэ үмдэдэг, урдаа hэтэрхэй хормойгүй хубсаhан (короткая, до талии, безрукавка, надеваемая поверх шубы замужней женщины): Хээтэй оодон уужатай, хажуу таладаа hомошо хутага шагтагаланхай, баруун гартаа хүхэ туулган бугааг зүүнхэй (Ц.-Ж. Жимбиев); 3) богони, охотор, ута бэшэ (короткий): Теэд Алексей Бармидай ерэхые хүлеэнгүй, оодон табатаяа үргэжэ ерээд лэ, нугаһан шэнгеэр шохойжо хэбтэһэн энгин хандагайн тархи руу буудаадхиба (Б. Мунгонов); Буусынгаа бухалнуудые һүрилһѳѳр, эсэгэнь оодон тэргэдээ морёо хүллэжэ, Харагшан Бадма хоёроо абаад, бухалшалха газар бэдэржэ мордобо (Ч. Цыдендамбаев); 4) грам. богони – һуури тухай (усечённый – об основе слова).