НИИДЭХЭ

үйлэ ү. 1) жэгүүртэй амитанай гү, али агаараар ябадаг түхеэрэлгын агаараар элихэ, агаарта дэгдэжэ хѳѳрэхэ, хиидэхэ (лететь, летать): Нуурай саада эрьеэр бүлэг нугаһад дальбараануудаа һорижо, ехэ сүлѳѳгүй ган-ган гэлдэн, иишэ-тиишээ ниидэнэ, уһан дээрэ тамарна (Д. Доржиева); Юуб гэхэдэ, hая болотор долоон хоногой нэгэ удаа энэ шэглэлээр агаарай онгосо ниидэдэг бэлэй (Буряад Yнэнһѳѳ); ниидэжэ ерэхэ агаараар элин ерэхэ (прилетать): Һүүлээрнь хэды арбаад турлаагууд ниидэн ерэжэ, айхабтар ехэ зугаа найр дээрэ сэнгэхээ байһан мэтэ хаагалалдаха юм (М. Осодоев); элин ниидэхэ шубуунай даляа хүдэлгэнгүй дэлгээд, агаараар һэлихэ (парить): Мяхаша шубууд үнѳѳхил хэбээрээ дээгүүрнь элин ниидэжэ, шадал тэнхээгээ барахыень хүлеэжэ яданал ха (М. Осодоев); 2) шэлж. зорихо, тэмүүлхэ, зорин ошохо (лететь, стремиться): Сээжэ сооһоом алтан сэсэг һалбаржа, / Сэдьхэл зүрхэнэйм баяр шамдаа ниидэнэл (Х. Намсараев).