НАЙГАХА

үйлэ ү. гуйбалзан хүдэлхэ, хоёр тээшээ гуйбаха (шататься, качаться из стороны в сторону): Ой түглын наагуурхи арьялаа шэнэһэд һалхинда һэжэрүүлэн найгажа, алтан шара зүүнүүдээрээ саһа шарлатар хушана (Ц. Номтоев); Найжатай ябахада найдабаритай, найгахадаш, тодожо бариха (Оньһ. ү.); найгаха надхаха а) иишэ тиишээ гуйбаха (покачиваться): Нарһан оройгоороо найган надхан, хүүебэ, шааяба, хүрэнхэй голоороо нижаганаба, хүбүүндэ юушьеб шэбэнэбэ (С. Доржиев); б) шоодб. эндэ тэндэ гэшхэлэн ябаха, һайзгайрха, нугалзаха нахилзаха (ходить расхлябанной походкой, качаться из стороны в сторону): Энэ үедэ харанууд отогой халтарые унаха болоһон Мархансайн Шагдар Доржын ойгуур ехэ баяртай, найган надхан халта харагдаба (Ч. Цыдендамбаев); 2) хэлтыхэ, хажуу тээшээ хэлтышоод байха, һарюу болохо (клониться набок): Зуун жэлнүүдтэ хүдэлѳѳгүй хушанууд юундэшьеб саһан нэмэргэтэеэ үрѳѳһэн тээшээ найгабад (Д.-Д. Дугаров); найгаха гунхаха тонгойхо, нахииха, урагшаа хэлтыхэ (склоняться, наклоняться): Эреэн таша сэсэгүүд найган гунхан эрьелдэжэ, жэргэмэлнүүд жэргэнэ, хоёр шэхэндэм һалхин шууяжа, нюдэдни уһаар халин дүүрэхэдэл гэнэ (А. Жамбалдоржиев); гэдэргээ найгаха хойшоо хэлтыхэ (отклоняться назад): Гэдэргээ найгаһан һарюу мурюушаг ород үзэгүүдые үгэ болгон үлхэнэ (Ч. Цыдендамбаев).