НҮХЭЛХЭ

үйлэ ү. 1) соолохо, нүхэ гаргаха (делать отверстие, дырявить, сверлить): Тээ саанаханань, үшѳѳ нэгэ модо тухай ябахадашни, хада нүхэлжэ хэһэн газар дорохи түрмэ байха (Д. Батожабай); Зобоһон нохой яһа химэлхэ, зобоһон хүн шулуу нүхэлхэ (Оньһ. ү.); һэтэ соо нүхэлхэ соолохо, юумэнэй һэтэ гаратарынь нүхэ гаргаха (делать сквозное отверстие, пробивать насквозь): Шүдэеэ хуурайдадаг, хюмһаяа ургуулдаг, хамар шэхэеэ һэтэ соо нүхэлдэг отог үндэһэтэн хэды олон бэ! (Ч. Цыдендамбаев); ◊ мухар нюдаргаар бухын хамар нүхэлхэ юушье мэдэхэгүй байгаад, нюдэ балай орохо (действовать вслепую, будучи несведущим): Уһанай гарахагүйень мэдэжэшье байгаа һаа, одоол мухар нюдаргаар бухын хамар нүхэлбэ гэдэгтэл, аза талаан бэдэрээд туршалган болоно ха юм даа! (Ш.-С. Бадлуев); 2) хонхойлгохо, нүхэ хэхэ, малтаха (делать углубление): …холын аянда эсэһэн хараалта эзэнтэеэ хамта хүр саһа нүхэлэн, хээрэ хонодогоо тэрэ шэбшэжэ болоо гү? (Д. Батожабай); 3) соо хибэхэ, соо мэрэхэ – хулганаан тухай (прогрызать – о мыши).