МОНСОЙЛГОХО

үйлэ ү., идх. залог 1) түхэреэн түхэлтэй болгохо (делать что-л. круглое, напр. комочек, свёрток, пучок): Тээ наанань Сэрэнцүү ута гэзэгынгээ һаалта хэхэгүйн тула, тархи дээрээ монсойлгон, улаахан пулаадаар уянхай, хүрин халаадаа үмдэнхэй ябана (Ц.-Ж. Жимбиев); монсойлгожо уяха суглуулан уяха, түхэреэн түхэлтэй болгоод уяха (завязывать свёрток): Тогоо торхоёо монсойлгожо уяад, хүнгэн хадань һамгандаа бэлэдхээ һэн (Д. Батожабай); монсойлгоһон хэлбэри түхэреэн болгоһон, сахариглаһан, мүндэгэр болгоһон, мүндылгэһэн, мондойлгоһон хэлбэри (закруглённая форма); 2) обоолхо, сомохо, обооргохо, даршалууха, харшалдуулха (собирать, скучивать): Булад … одоошье адуугаа хуряан монсойлгожо, гүүртэ руунь шэглүүлэн хатаргаба (Б. Мунгонов); нюдаргаа монсойлгохо нюдаргаа шанга адхаха, зангидаха (сжимать кулаки): – Үнжэгэн бэетэй эхэнэрнүүд гээшэ гэжэ ойлгохо мэдэрэл тэдэ арьяатанай толгой соо олдохогүйл, – гэжэ Баторов нюдаргаа монсойлгон бажууба (Б. Шойдоков); бүхы хүсѳѳ монсойлгон хүдэлхэ бүхы шадалаараа хүдэлхэ, шадахысаа хүдэлхэ, бии үгыгѳѳ гаргажа хүдэлхэ (работать, напрягая все свои силы).