МЭТЭ

наречи 1) адли, адляар, шэнги, шэнгеэр, мэтээр, хэбэртэйгээр (как, словно, точно, подобно, как будто): Хүбэн мэтэ хүбхэгэр зузаан саһан хаа-хаанагүй тогтоод, халташье хиидэнэгүй (Б. Санжин); Юундэшьеб инаг һайхан хүүхэниинь эдэнээр ябалсаһан мэтэ һанагдана (А. Ангархаев); аха дүү мэтэ түрэлэй зон шэнги (как братья): Эдэ жэлнүүдтэ би таанарые аха дүү мэтэ һанажа дурлажа ябааб (Б. Санжин, Б. Дандарон); эсэгэ мэтэ энхэргэнээр эсэгэдэ адли илдамаар (ласково, как отец): Эгээл энэ үедэ баабайнь унаган нүхэр Намсарай моришон ерээд, эсэгэ мэтэ энхэргэнээр энеэбхилжэ, мүр дээрэнь гараа дүмүүхэн табиба (М. Осодоев); хонгёохон хонхо мэтэ хоолой хонгёохон хонхын абяан шэнги дуулдадаг хоолой (звонкий голосок, голосок как колокольчик): – Нагаса абгай, энэтнай эшэнэ ха юм, – гэжэ үнѳѳхи басаган уралаа жэмылгэн, энеэдэһэеэ баряад, хонгёохон хонхо мэтэ хоолойгоор дуугаржархиба (А. Жамбалдоржиев); али мэтэ ямаршье, алишье, алибаа, ямар нэгэн, али нэгэн (какой бы то ни был, какой-нибудь, любой); урда мэтэ урдынхида адли (как прежде): Мүнѳѳ тэрэ Доржи Цыреновичые хэдышье хүндэлѳѳ һаа, урда мэтэ тэрэнһээ айхаа болиһон байба (Ж. Тумунов); гэхэ мэтэ болоод, бэшэшье (и так далее, и прочее): Гурбадахи мориёо худалдажа, гурил, дабһан, тамхин, зуруул, саахар гэхэ мэтэ болгоо бэлэйбди (В. Гармаев).