МЭНЭ

наречи 1) энэ дороо, энэ гэһээр, удангүй, сагтаа, мэтэр байсар, мэтэр зуура, абаһаар, дары, түр зуура, тэрэ бэеэрээ (вот-вот, с минуты на минуту, тут же, сразу): Долгормаа мэнэ гүйжэ ошохоор бэлэн, һандайн түшэлгэ бажуугаад, үндэгэшэжэ һууба (С. Цырендоржиев); Түүдэгэй ойгуур басагадай гарахада торгон дэгэлэй нарбагар хормойнууд галда угалзата ошоор ялабхяад мэнэ унтарна (Ч. Цыдендамбаев); мэнэ-мэнэ, мэнэ гэһээр (гү, али байтар) энэ дороо, энэ гэһээр, сагтаа (сейчас же, сию минуту): Харин зүүн талынь дэнгэй охорхон түгэсэг хайлаһан тоһоёо үерлүүлэн билтаргаад, мэнэ-мэнэ унтархаяа, галаа шобхор-шобхор гүүлэн, уйтайгаар шатана (Ч. Цыдендамбаев); Мэнэ гэһээр, хахад сагшье болонгүй, ханилһан гансатаяа уулзажа, гэрэлтэй һайхан шарайень харахань, уян зѳѳлэхэн хоолойень шагнахань ха юм (Б. Мунгонов); Мэнэ байтар бодожо үзѳѳд, шиидэгты, үгы hаатнай, нэгэтэл эндэhээ гаража ошоболни, дахин хэзээдэшье харалсахагүйбди! (soyol.ru); 2) һаяхан, үни болоогүй (вот сейчас, только что): – Жалмаа, танинагүй гүт? – гэжэ мэнэ ороһон хүн бүдүүн хоолойгоор хүнхинэсэ асууба (Д. Батожабай); мэнэ һая (гү, али һаяхан) һаб һаяхан, тон һая, үни болоогүй (вот только что): Тиигээд удаан ѳѳдѳѳ хараад хэбтэхэ зуураа мэнэ һая зүүдэлһэн зүүдэеэ һанаандаа оруулнаб (А. Жамбалдоржиев); Тиихэдээ мэнэ һаяхан хүхюутэй ябаһан нюурынь сог залигүй болошобо (Д. Батожабай); мэнэ һая болотор һаяхан болотор, тон һая болотор (до недавнего времени, до последнего); 3) үтэр, үтэр түргэн, хурдан, яаралтай, энэ дороо (быстро, немедленно): – Һэй, Дамба, мэнэ минии мори эмээллээд, сээнтэр гүйлгэ, лейтенант Ванчиковта дуулга (С. Цырендоржиев).