ГОНГОР

юум. н., хууш. монг. Сагаан этигэлтэ, будд. Бурхан шажанай арбан дошхон сахюусанай нэгэнэйнь нэрэ (одно из 10 божеств-защитников веры, хранителей учения): Гонгор бурханай дүрэнь дошхон шэрүүншье һаа, мэшэеэһэн шарайтай, толгой дээрээ бурханиие залаһан, эрдэниин хонхоор бэеэ шэмэһэн, ехэ галай дүлэн соо оршожо, бадма лёнхобо, наран дэбисхэр дээрэ заларна. Абаралай мотортой. Баруун талын эхин моторынь хүсэлые хангагша шандамани эрдэниин бэлигтэй, зүүн талын эхин моторынь эрдэниин нура буулгаһан бэлигтэй, дунда талын баруун мотортоо ами таһалагша зэмсэгтэй, дунда талын зүүн мотортоо хамаг амитаниие һүрѳѳр дарагша 3 үзүүртэ һэрээтэй, баруун талын доодо моторто урин залагша дамааритай, зүүн талын доодо моторто юртэмсэдэхиниие энхэдээ, оруулагша гохо дэгээтэй, бүгэдые абаран сахигша дошхон бурхан гэнэ. Гонгор сахюусаниие урижа, тахил үргэн хүндэдхэжэ тахижа ёһолол үйлэдэдэг заншалтай (С. Гансүрэн).